मुंबई: नाशिकमधील बहुचर्चित भोंदू बाबा अशोक खरात प्रकरणावर आधारित ‘महाराष्ट्र एप्स्टिन फाइल्स’ या चित्रपटाच्या चित्रीकरणाला मुंबईत दिमाखात सुरुवात झाली आहे. नुकताच या चित्रपटाच्या सेटवरील पहिला लूक सोशल मीडियावर व्हायरल झाला असून, या पहिल्याच झलकाने मनोरंजन विश्वात आणि राजकीय वर्तुळात मोठी उत्सुकता निर्माण केली आहे.
दिपाली सय्यद साकारणार डॅशिंग महिला नेत्याची भूमिका
या चित्रपटात प्रसिद्ध अभिनेत्री आणि शिवसेना नेत्या दिपाली सय्यद या एका अत्यंत महत्त्वाच्या भूमिकेत दिसणार आहेत. सेटवरून समोर आलेल्या त्यांच्या पहिल्या लूकची सध्या सोशल मीडियावर जोरदार चर्चा आहे. दिपाली सय्यद या चित्रपटात महाराष्ट्रातील एका अतिशय चर्चित महिला नेत्याची व्यक्तिरेखा पडद्यावर साकारत असल्याचे समजते. त्यांच्या या लूकमुळे चित्रपटाबाबतची उत्सुकता अधिकच ताणली गेली आहे.
‘अशोक खरात’ कोण? मुख्य अभिनेत्याचा चेहरा गुलदस्त्यात!
संपूर्ण महाराष्ट्राला हादरवून सोडणाऱ्या अशोक खरात यांची मुख्य भूमिका कोणता अभिनेता साकारणार, याबाबत अद्याप सस्पेन्स कायम आहे. निर्मात्यांनी या अभिनेत्याचे नाव अत्यंत गुप्त ठेवले आहे. सोशल मीडियावर व्हायरल झालेल्या फोटोमध्ये संबंधित अभिनेता पाठमोरा उभा असलेला दिसत आहे. त्यामुळे या संवेदनशील आणि वादग्रस्त भूमिकेत नेमका कोणता दिग्गज अभिनेता झळकणार, याकडे सर्वांचे डोळे लागले आहेत.
राजकीय आणि सामाजिक खळबळ पडद्यावर येणार
नाशिकचे अशोक खरात प्रकरण हे केवळ गुन्हेगारीपुरते मर्यादित नसून त्याचे धागेदोरे सामाजिक आणि राजकीय स्तरावरही पोहोचले होते. या प्रकरणामुळे राज्यभरात मोठी खळबळ उडाली होती. आता याच सत्य घटनेवर आधारित ‘महाराष्ट्र एप्स्टिन फाइल्स’ हा चित्रपट येत असल्याने, यात कोणते मोठे खुलासे होणार याकडे प्रेक्षकांचे लक्ष लागले आहे.
चित्रपटाच्या संपूर्ण स्टारकास्ट आणि कथानकाबाबत निर्मात्यांनी अद्याप कोणतीही अधिकृत घोषणा केलेली नाही. मात्र, पहिल्याच लूकने इंटरनेटवर धुमाकूळ घातला असून प्रेक्षक या सिनेमाची आतुरतेने वाट पाहत आहेत.
