भुसावळ : येथील फातेमा कॉलनी परिसरात बंद घराचे कुलूप तोडून 5 लाख 70 हजार रुपयांचे सोन्या-चांदीचे दागिने आणि रोकड लंपास करणाऱ्या आरोपीला भुसावळ बाजारपेठ पोलिसांनी अवघ्या दोन दिवसांत अटक केली आहे. पोलिसांनी आरोपीकडून 4 लाख 99 हजार 100 रुपये किमतीचा मुद्देमाल हस्तगत करण्यात यश मिळवले आहे.फिर्यादी वसीम अहमद अब्दुल बासीद शेख (रा. फातेमा कॉलनी, भुसावळ) हे 28 ते 30 मार्च दरम्यान आपल्या घराला कुलूप लावून बाहेरगावी गेले होते. या संधीचा फायदा घेत अज्ञात चोरट्याने त्यांच्या घरात शिरून 5 लाख 70 हजार रुपयांचा ऐवज चोरून नेला होता. या प्रकरणी भुसावळ बाजारपेठ पोलीस स्टेशनला गुन्हा दाखल करण्यात आला होता. पोलीस अधीक्षक डॉ. महेश्वर रेड्डी आणि अपर पोलीस अधीक्षक अशोक नखाते यांच्या मार्गदर्शनाखाली पोलीस निरीक्षक राहुल वाघ यांनी गुन्ह्याचा तपास करण्यासाठी डी.बी. पथकाला सूचना दिल्या होत्या. तपासादरम्यान पोलीस निरीक्षक वाघ यांना गुप्त बातमीदाराकडून मिळालेल्या माहितीनुसार, पोलिसांनी अमीर खान हबीब खान (वय 35, रा. न्यू ईदगा जवळ, भुसावळ) याला ताब्यात घेतले.पोलिसी खाक्या दाखवताच आरोपी अमीर खान याने एका विधी संघर्ष बालकाच्या मदतीने ही चोरी केल्याची कबुली दिली. पोलिसांनी त्याच्याकडून चोरीला गेलेल्या मालापैकी 4 लाख 99 हजार 100 रुपयांचा मुद्देमाल जप्त केला आहे. न्यायालयाने आरोपीला तीन दिवसांची पोलीस कोठडी सुनावली आहे. ही कारवाई उपविभागीय पोलीस अधिकारी केदार बारबोले, पोलीस निरीक्षक राहुल वाघ यांच्या मार्गदर्शनाखाली पोलीस उपनिरीक्षक राजू सांगळे, विजय नेरकर, कांतीलाल केदारे, योगेश माळी, भूषण चौधरी, अमर अढाडे, दिलीप कोल्हे, चंद्रकांत रायपूरकर, अक्षय कोतकर, प्रशांत सोनार, जीवन कापडे, जावेद शहा, सचिन चौधरी, महेंद्र पाटील आणि हर्षल महाजन यांच्या पथकाने केली.
