जळगाव: तालुक्यातील ‘नवीन रायपूर’ गावात गेल्या महिनाभरापासून रस्त्यावरील पथदिवे (Street Lights) पूर्णपणे बंद आहेत. ऐन पावसाळ्यात संपूर्ण गाव अंधाराच्या विळख्यात सापडल्याने ग्रामस्थांना जीव धोक्यात घालून प्रवास करावा लागत आहे. वारंवार तक्रारी करूनही ग्रामपंचायत प्रशासन ढिम्म असल्याने नागरिकांमधून तीव्र संताप व्यक्त केला जात आहे.
- महिनाभरापासून अंधार: एमआयडीसी परिसराजवळील नवीन रायपूर गावात महिनाभरापासून पथदिवे गुल.
- सरपटणाऱ्या प्राण्यांचा धोका: पावसाळ्यामुळे वाढलेल्या झाडीझुडपांतून साप, विंचू थेट रस्त्यावर; लहान मुले आणि महिलांमध्ये भीतीचे वातावरण.
- चिखल आणि अंधाराचे साम्राज्य: खराब रस्ते, साचलेले पाणी आणि त्यातच अंधार यामुळे अपघातांची मालिका सुरू.
- प्रशासकीय अनास्था: अधिकारी आणि लोकप्रतिनिधी जबाबदारी घेण्याऐवजी एकमेकांकडे बोट दाखवण्यात व्यस्त.
जबाबदारी झटकण्यात प्रशासन ‘नंबर वन’!
ग्रामस्थांनी ग्रामपंचायत कार्यालयाचे उंबरठे झिजवूनही दिव्यांची दुरुस्ती झालेली नाही. या समस्येबाबत जेव्हा विचारणा करण्यात आली, तेव्हा प्रशासकीय यंत्रणेचा बेजबाबदारपणा समोर आला:
- सरपंच पती नितीन सपकाळे यांचे आश्वासन: “कर्मचाऱ्यांशी चर्चा करून दोन-तीन दिवसांत वीजपुरवठा सुरू करू.” (मात्र अद्याप कोणतीही कारवाई नाही)
- ग्रामसेवकांचे हात वर: “मी नुकताच रुजू झालोय, मला काही माहिती नाही. पूर्वीच्या ग्रामसेविका किंवा कर्मचाऱ्यांशी बोला,” असे सांगत नवनियुक्त ग्रामसेवकांनी आपली जबाबदारी झटकली.
ग्रामस्थांची आक्रमक मागणी“आम्ही नियमित कर भरतो, मग आम्हाला अंधारात का राहावे लागते?” असा संतप्त सवाल रायपूरचे नागरिक विचारत आहेत. गावातील वीज दिवे तातडीने दुरुस्त करून तात्काळ दिलासा न दिल्यास तीव्र आंदोलन करण्याचा इशारा ग्रामस्थांनी दिला आहे.
